Kryeprokurori i Prokurorisë Themelore në Prizren, Petrit Kryeziu, ka konfirmuar nisjen e veprimeve konkrete hetimore pas evidentimit të parregullsive serioze gjatë procesit të rinumërimit të votave në këtë rajon.
Në një prononcim për TV Dukagjini, Kryeziu bëri të ditur se Prokuroria e Shtetit ka monitoruar procesin dhe, tani që rinumërimi po shkon drejt fundit, janë konstatuar keqpërdorime të qarta të votave brenda listave të subjekteve politike në Prizren.
Sipas tij, duke vepruar me vetiniciativë, ai ka lëshuar autorizim të menjëhershëm për Policinë e Kosovës që të identifikojë personat përgjegjës dhe të sigurojë provat materiale, përfshirë procesverbalet dhe nënshkrimet e të implikuarve.
“Çdo person që ka vendosur nënshkrimin e tij duke falsifikuar rezultatet zgjedhore dhe duke tjetërsuar vullnetin e qytetarit, nuk duhet të qëndrojë i qetë; ata do të mbajnë përgjegjësi të plotë penale,” deklaroi prerë Kryeziu.
Ai ritheksoi se manipulimi i votës dhe falsifikimi i dokumenteve zgjedhore përbëjnë vepra të rënda penale dhe se drejtësia nuk do të bëjë asnjë kompromis në trajtimin e këtyre rasteve./lajmishqip.net