Lista Serbe ka zyrtarizuar ankesën e saj në Gjykatën Kushtetuese të Kosovës, duke kundërshtuar ashpër zgjedhjen e Nenad Rashiqit në postin e nënkryetarit të Kuvendit nga radhët e komunitetit serb. Sipas deputetit Igor Simiq, ky vendim përbën një shkelje flagrante të Kushtetutës, Rregullores së Punës së Kuvendit dhe një aktgjykimi të mëparshëm të vetë Gjykatës.
Përveç ankesës, Lista Serbe ka kërkuar vendosjen e një mase të përkohshme për të pezulluar menjëherë vendimin, me argumentin se veprimet e Kuvendit rrezikojnë të shkaktojnë dëme të pakthyeshme.
Tensioni u ndez pas seancës konstituive të 10 tetorit, ku nëntë deputetët e Listës Serbe nuk arritën të siguronin votat e nevojshme për kandidatin e tyre. Pas këtij dështimi, Kryetari i Kuvendit, Dimal Basha, procedoi me votimin e kandidatit tjetër nga komuniteti serb, Nenad Rashiq.
Zgjedhja e Rashiqit u mundësua nga votat e Lidhjes Demokratike të Kosovës (LDK) dhe Lëvizjes Vetëvendosje (LVV), ndërsa Partia Demokratike e Kosovës (PDK) abstenoi. Rezultati final i votimit ishte 71 vota pro, 9 kundër dhe 24 abstenime, duke thelluar kështu përçarjen politike./lajmishqip.net
