Presidenti i FIFA-s, Gianni Infantino, ka bërë një vlerësim të jashtëzakonshëm për progresin e futbollit kosovar, duke e cilësuar Kombëtaren e Kosovës si një kundërshtar të cilin tashmë të gjithë dëshirojnë ta shmangin. Gjatë një interviste ekskluzive për podcastin zyrtar të Federatës së Futbollit të Kosovës (FFK), ai ka thurur elozhe për transformimin mbresëlënës të vendit në një periudhë shumë të shkurtër.
Infantino vlerësoi lart investimet strategjike të FFK-së në të gjitha nivelet, nga futbolli i vajzave dhe meshkujve deri te ekipet kombëtare. Ai theksoi se ky përkushtim e ka kthyer Kosovën në një forcë konkurruese serioze në arenën ndërkombëtare.
Në një prononcim të drejtpërdrejtë, kreu i futbollit botëror deklaroi: “Dua të them që investimet që janë bërë nga Federata e Futbollit të Kosovës për futbollin e vajzave, për futbollin e meshkujve, për ekipet nacionale janë mbresëlënëse. Sot askush nuk dëshiron të luajë kundër Kosovës sepse të gjithë kanë frikë se do të humbasin, sepse ekipi është i fortë dhe ju keni kaq shumë tifozë në Kosovë dhe gjithandej. Këto janë shembuj për të rinjtë e një vendi të ri, i cili ka nevojë gjithashtu për ta ndërtuar identitetin e vet si shtet. Futbolli padyshim kontribuon shumë në këtë drejtim.”
Këto komente vijnë pas vizitës së tij të fundit në Kosovë, ku Infantino u nderua me medaljen presidenciale të meritave nga Presidentja Vjosa Osmani, çka dëshmon për marrëdhëniet e afërta dhe respektin e ndërsjellë mes FIFA-s dhe FFK-së./lajmishqip.net
