Pas incidentit të rëndë ku dronë rusë shkelën hapësirën ajrore të Polonisë, Presidenti ukrainas Volodymyr Zelensky ka lëshuar një thirrje urgjente për të gjithë kontinentin, duke kërkuar krijimin e menjëhershëm të një “mburoje ajrore efektive” mbi Evropë.
Në një postim në Telegram të mërkurën, pas bisedimeve telefonike me Kryeministrin polak Donald Tusk, Sekretarin e Përgjithshëm të NATO-s Mark Rutte dhe udhëheqës të tjerë evropianë, Zelensky theksoi se kërcënimet aktuale kërkojnë një reagim të përbashkët dhe vendimtar.
“Ne duhet të punojmë për një sistem të përbashkët të mbrojtjes ajrore,” shkroi Zelensky. Ai shtoi se kjo ide ishte propozuar nga Ukraina shumë kohë më parë dhe se tashmë ekzistojnë vendime konkrete që duhen zbatuar. “Duhet të reagojmë së bashku ndaj të gjitha sfidave aktuale dhe të jemi të përgatitur për kërcënime të mundshme për të gjithë evropianët në të ardhmen,” përfundoi ai. /lajmishqip.net