Kryeministri britanik, Keir Starmer, dhe kancelari gjerman, Friedrich Merz, do të firmosin sot në Londër një traktat historik anglo-gjerman, duke u zotuar për ndihmë mbrojtëse reciproke në rast sulmi të armatosur, siç raporton Bloomberg.
Sipas agjencisë Politico, ky traktat përfaqëson paktin më të rëndësishëm dypalësh mes dy shteteve që prej vitit 1945.
Marrëveshja, e cilësuar nga Bloomberg si pjesë e një rishikimi të gjerë të marrëdhënieve, vjen si pasojë e shqetësimeve në rritje në Evropë lidhur me agresionin rus dhe dyshimet mbi përkushtimin e SHBA-së ndaj NATO-s nën udhëheqjen e presidentit Donald Trump.
Ndonëse pakti përforcon detyrimet ekzistuese brenda NATO-s, zyrtarë të të dyja qeverive kanë theksuar se ai nuk e zëvendëson parimin e mbrojtjes kolektive të Nenit 5 të aleancës, bën të ditur Telegrafi.
Pakti, i cili do të firmoset në një ceremoni në muzeun Victoria dhe Albert të Londrës, ndërtohet mbi bazën e hedhur nga paraardhësi i Starmer si dhe nga kancelari Olaf Scholz, paraardhësi i Merz, gjatë një takimi në Berlin në vitin 2023.
Ky traktat simbolizon një thellim të raporteve pas Brexit-it dhe një përafrim në rritje strategjik mes Londrës dhe Berlinit.
Një nga elementët kryesorë të paktit është zotimi i përbashkët për të zhvilluar një sistem të ri raketash me rreze të gjatë veprimi, i njohur si “Deep Precision Strike”, brenda dekadës së ardhshme.
Ky sistem, me një rreze veprimi prej më shumë se 2,000 kilometrash, parashikohet të stimulojë investime të mëdha industriale në sektorët evropianë të mbrojtjes.
Edhe pse armët bërthamore nuk përmenden në mënyrë eksplicite, marrëveshja ka një rëndësi të veçantë për Gjermaninë, e cila nuk zotëron arsenal bërthamor dhe varet nga ombrella mbrojtëse e SHBA-së dhe dy fuqive bërthamore evropiane, Britanisë dhe Francës.
Traktati adreson gjithashtu pasojat më të gjera të daljes së Britanisë nga BE, duke përfshirë rregullime për tregtinë, transportin dhe migracionin e parregullt.
Sipas një deklarate nga zyra e kryeministrit Starmer, Gjermania do të miratojë deri në fund të vitit legjislacion që e bën të paligjshëm lehtësimin e migrimit të parregullt drejt Mbretërisë së Bashkuar, raporton lajmishqip.