Zëvendëspresidenti i Shteteve të Bashkuara, JD Vance, ka deklaruar se SHBA nuk është në luftë me Iranin, duke theksuar se konflikti është i përqendruar ekskluzivisht te programi bërthamor i Teheranit dhe se ai nuk ka frikë se luftimet do të zgjasin.
“Nuk jemi në luftë me Iranin. Jemi në luftë me programin bërthamor të Iranit,” këmbënguli Vance.
Duke folur për të qartësuar objektivat e Uashingtonit, Vance shtoi se SHBA nuk synon ndryshimin e regjimit në Teheran, një qëndrim ky që bie ndesh me thirrjet e disa zyrtarëve të lartë izraelitë. Ai po ashtu theksoi se Amerika “nuk ka interes” të dërgojë trupa ushtarake në terren.
Ky qëndrim vjen në linjë me doktrinën e Presidentit Donald Trump për të mos e përfshirë Amerikën në “lufta të përjetshme”. Deklaratat e Vance shihen si një përpjekje për të qetësuar një pjesë të bazës politike ‘MAGA’, e cila ka shprehur shqetësim dhe përçarje pas vendimit për të goditur Iranin.
Zëra të tjerë të rëndësishëm në Uashington, përfshirë zyrtarin e Pentagonit, Pete Hegseth, po ashtu kanë përforcuar idenë se bëhet fjalë për një sulm të kufizuar dhe jo për fillimin e një lufte të zgjatur, raporton lajmishqip.
