Misioni i NATO-s në Kosovë (KFOR) ka konfirmuar të hënën se është në dijeni për njoftimin e Policisë së Kosovës, sipas të cilit një shtetas i Kosovës, i nacionalitetit serb, dyshohet se është plagosur dhe rrëmbyer nga xhandarmëria serbe brenda territorit të Kosovës. Megjithatë, KFOR thekson se situata e sigurisë përgjatë vijës kufitare administrative mbetet e qetë.
“Policia e Kosovës ka nisur hetimet dhe është në kontakt të ngushtë me disa entitete, përfshirë KFOR-in. Aktivitetet në anën kosovare të vijës kufitare janë koordinuar me KFOR-in,” thuhet në përgjigjen e këtij misioni, transmeton Radio Evropa e Lirë.
Autoritetet e Kosovës e kanë akuzuar Serbinë për shkelje të integritetit territorial, pasi më 1 nëntor Policia e Kosovës pranoi informacione se në zonën e Leposaviqit, një shtetas kosovar me inicialet M.V. ishte plagosur dhe rrëmbyer nga xhandarmëria serbe.
Në anën tjetër, autoritetet serbe nuk kanë dhënë asnjë deklaratë zyrtare për këtë rast.
Sipas Policisë, vendi i ngjarjes ndodhet brenda territorit të Republikës së Kosovës, në zonën e njohur si “pika zero”, pranë kufirit me Serbinë. Policia ka theksuar se po bashkëpunon me KFOR-in, si autoritet përgjegjës për sigurinë në brezin kufitar.
Presidentja Vjosa Osmani e cilësoi ngjarjen si një akt që kërkon reagim të menjëhershëm të botës demokratike, duke theksuar se Serbia po vazhdon një qasje hegjemoniste dhe po sulmon “çdo qytetar që guxon të thotë të vërtetën për regjimin autokratik të Vuçiqit”.
Edhe ministri në detyrë i Punëve të Brendshme, Xhelal Sveçla, reagoi ashpër, duke e quajtur rastin pjesë të një politike serbe të frikësimit dhe përndjekjes së qytetarëve që nuk i binden regjimit të Vuçiqit.
“Kjo qasje agresive dhe provokuese e Serbisë është e papranueshme dhe përbën shkelje të rëndë të kufirit shtetëror dhe të drejtave të qytetarëve tanë,” shkroi Sveçla në Facebook, duke kërkuar reagim ndërkombëtar që të parandalohet përsëritja e rasteve të tilla.
Sipas dëshmive të para, viktima M.V. është dërguar me autoambulancë drejt Nishit në Serbi, pasi disa persona të maskuar kishin hyrë në territorin e Kosovës, e kishin plagosur dhe rrëmbyer, për ta transferuar më pas në Serbi.
Radio Evropa e Lirë ka kontaktuar Ministrinë e Punëve të Brendshme dhe Ministrinë e Mbrojtjes së Serbisë, por asnjëra nuk është përgjigjur deri më tani. Po ashtu, Qendra Klinike Universitare e Nishit nuk ka dhënë asnjë koment.
Informacionet e para për incidentin u publikuan nga avokati serb Ivan Niniq, i cili në rrjetin X (Twitter) shkroi se Milan Vukashinoviq ishte plagosur rëndë në fshatin Jellakcë, afër Leposaviqit, dhe se mjekët në Nish po përpiqeshin t’i shpëtonin jetën.
Kujtojmë se KFOR është reaktori i tretë i sigurisë në Kosovë, pas Policisë së Kosovës dhe misionit të BE-së për sundim të ligjit (EULEX), dhe mbetet përgjegjës për sigurinë në vijën kufitare me Serbinë.
Kjo nuk është hera e parë që autoritetet e Kosovës akuzojnë xhandarmërinë serbe për hyrje në territorin kosovar. Në mars 2012, dy policë të Kosovës ishin arrestuar në fshatin Dumnicë të Podujevës dhe u liruan pas 48 orësh, ndërsa në vitin 2023, tre pjesëtarë të Policisë së Kosovës u arrestuan nga autoritetet serbe në një incident të ngjashëm./lajmishqip.net