Ambasada e Shteteve të Bashkuara të Amerikës në Tiranë e ka uruar kreun e SPAK, Altin Dumani pas vlerësimit që ky i fundit mori nga Sekretari amerikan i Shtetit, Antony Blinken si një ndër kampionët e luftës kundër korrupsionit.
Teksa i cilësoi frymëzuese përpjekjet e Dumanit, ambasada e SHBA shprehet se do të jetë gjithnjë pranë tij dhe institucioneve të drejtësisë derisa barazia para ligjit të bëhet realitet për të gjithë qytetarët shqiptarë.
“Ky çmim nderon vendosmërinë, guximin dhe integritetin tuaj të palëkundur në ndjekjen e drejtësisë në emër të popullit shqiptar. Puna juaj frymëzon të gjithë ata që besojnë në fuqinë e së vërtetës dhe llogaridhënies. Ambasada e SHBA do të vazhdojë të punojë me ju, me SPAK dhe me të gjithë institucionet e drejtësisë për të bërë realitet barazinë përpara ligjit për të gjithë qytetarët e Shqipërisë”, shkruan ambasada.