Kryetari i Partisë Demokratike të Kosovës, Bedri Hamza, pas takimit me kryeministrin Albin Kurti, është deklaruar para mediave ku ka shpalosur një mundësi konkrete dhe përfundimtare për të shmangur shkuarjen e vendit në zgjedhje të parakohshme.
Gjatë fjalës së tij, Hamza bëri të ditur se pas mbledhjes së Kryesisë së PDK-së, kjo parti po ofron një shans të fundit për të zgjidhur ngërçin. Kërkesa e tyre është e qartë: zgjedhja e presidentit të propozuar nga Partia Demokratike e Kosovës, si e vetmja rrugë për të garantuar stabilitetin institucional.
Ai theksoi se kjo ofertë është bërë në frymën e lartë të përgjegjësisë, me qëllim që të mos lihet vend për kriza të panevojshme. Sipas Hamzës, me këtë propozim, PDK-ja e konsideron të përmbushur plotësisht kontributin e saj në këtë proces politik.
Duke kujtuar rëndësinë e kohës, ai vuri në dukje se sot është 28 shkurt dhe kanë kaluar tashmë dy muaj nga zgjedhjet e 28 dhjetorit, si dhe më shumë se dy javë që nga votimi i Qeverisë “Kurti 3”.
Lideri i PDK-së nënvizoi se kjo është dita e fundit e muajit dhe se kanë mbetur vetëm katër ditë deri në përfundimin e afatit kushtetues për zgjedhjen e kreut të shtetit.
Në këtë kuadër, ai shtroi pyetjen nëse takimet e minutës së fundit po zhvillohen për zgjidhje reale apo për të ngushtuar kohën artificialisht, me qëllim që barra e dështimit të zhvendoset te opozita. Një qasje e tillë, sipas tij, dëmton funksionimin normal të institucioneve.
Në mbyllje, Hamza rikonfirmoi se PDK-ja ka dhënë ofertën e saj për tejkalimin e situatës. Ai deklaroi prerazi se nga sot, Partia Demokratike e Kosovës nuk do të jetë më pjesë e asnjë veprimi tjetër formal në kuadër të këtij procesi. /lajmishqip.net
