Autobusët e Trafikut Urban në Prishtinë shpesh përballen me një mbingarkesë udhëtarësh që tejkalon kapacitetet normale. Lidhur me këtë sfidë, kryeshefi ekzekutiv i ndërmarrjes, Qendrim Vitija, ka konfirmuar në një intervistë për Ekonomia Online se, në bashkëpunim me Komunën e Prishtinës, po punohet intensivisht për ridizajnimin e linjave ekzistuese.
“Është fakt që disa linja që menaxhohen nga Trafiku Urban janë mjaft të ngarkuara. Megjithatë, në aspektin e përdorimit, ky është një lajm i mirë pasi tregon se qytetarët po e vlerësojnë transportin publik. Faktorët kryesorë janë çmimet mjaft të përballueshme të biletave, sidomos atyre mujore, që nxisin përdorimin masiv të autobusëve,” theksoi Vitija.
Kryeshefi pranoi se shtimi i mjeteve në linja të caktuara është i domosdoshëm për të rritur cilësinë e shërbimit. Megjithatë, ai sqaroi se për momentin ndërmarrja nuk disponon autobusë rezervë që mund të vihen menjëherë në qarkullim për të lehtësuar fluksin e madh.
“Kemi nevojë reale për të shtuar nisjet, por aktualisht jemi në kufijtë e kapaciteteve tona teknike. Jemi në koordinim të vazhdueshëm me Komunën që linjat të ridizajnohen dhe të optimizohen sipas frekuencës së përdorimit, veçanërisht gjatë orëve të pikut. Ky proces do të jetë i plotë kur të arrijë flota e re, duke mundësuar shpërndarje më të mirë të udhëtarëve,” shtoi ai.
Sipas drejtuesit të Trafikut Urban, projekti madhor që pritet të transformojë transportin në kryeqytet mbetet shtimi i autobusëve të rinj dhe riorganizimi rrënjësor i rrjetit aktual për një efikasitet më të lartë.
“Projekti kryesor i Komunës së Prishtinës parashikon një ridizajnim komplet të linjave. Përmes këtij plani strategjik, qytetarët do të shpërndahen drejt destinacioneve të tyre në mënyrë më të organizuar, duke pasur mundësi të shfrytëzojnë disa linja të koordinuara në vend të varësisë nga një autobus i vetëm,” përfundoi Vitija. /lajmishqip.net