WhatsApp po e rrit edhe më tej nivelin e sigurisë për përdoruesit e saj. Së shpejti, aplikacioni do të ofrojë mundësinë e përdorimit të autentifikimit me “passkey” për mbrojtjen e kopjeve rezervë të bisedave.
Ky funksion i ri do t’u lejojë përdoruesve të mbrojnë kopjet rezervë përmes të dhënave biometrike – si gjurmët e gishtërinjve apo njohja e fytyrës – si dhe përmes PIN-it të pajisjes. Kjo nënkupton se nuk do të ketë më nevojë për fjalëkalime komplekse apo çelësa 64-shifrorë që deri tani janë përdorur për enkriptimin e të dhënave.
Funksioni do të jetë i disponueshëm për Android dhe iOS në javët në vijim, me implementim gradual sipas rajoneve. WhatsApp tashmë e mbështet “passkey” gjatë hyrjes në llogari, ndërsa zgjerimi i tij edhe për kopjet rezervë përfaqëson një hap të rëndësishëm drejt një sistemi sigurie pa fjalëkalime.
Pas aktivizimit, përdoruesit do të mund të rikuperojnë të dhënat e tyre përmes biometrisë ose PIN-it, pa kompromentuar sigurinë dhe privatësinë personale.
Në këtë mënyrë, WhatsApp synon të thjeshtësojë procesin e rikuperimit të të dhënave, duke reduktuar rrezikun e keqpërdorimit të fjalëkalimeve.
Nga Meta është theksuar se qëllimi është t’u ofrohet përdoruesve më shumë kontroll mbi informacionin e tyre, ndërsa siguria mbetet prioriteti kryesor i platformës./lajmishqip.net
