Deputeti i sapozgjedhur nga radhët e Partisë Demokratike të Kosovës, Nait Hasani, ka reaguar ashpër ndaj skandalit të manipulimit të votave, ku procesi i rinumërimit në disa vendvotime rezultoi me heqjen e plot 3 mijë e 414 votave nga llogaria e tij.
Sipas vlerësimit të tij, ky proces përbën një goditje të rëndë mbi vullnetin autentik të votuesve dhe një tentativë të ulët për të instrumentalizuar emrin e tij në skema manipuluese.
“Ajo që vërejta gjatë rinumërimit dëshmon se votat e mia janë rritur artificialisht dhe në mënyrë të padrejtë, duke keqpërdorur figurën time për thyerje të papranueshme zgjedhore. Ky akt nuk është vetëm një shkelje e hapur ligjore, por paraqet edhe një degjenerim të rëndë moral e politik”, ka deklaruar Hasani, duke i refuzuar prerazi votat që nuk janë produkt i bindjes qytetare dhe duke u rreshtuar krah transparencës.
“E refuzoj në mënyrë kategorike çdo votë që nuk është burim i vullnetit të lirë të popullit. Angazhimi im në politikë nuk synon fitoren përmes mashtrimit, por përmes besimit të ndershëm; nuk kam asnjë nevojë për vota të tjetërsuara sepse integritetin e çmoj mbi çdo shifër”, theksoi Hasani.
Në fund, ai ka bërë thirrje për reagim të organeve të drejtësisë, duke konfirmuar përkushtimin e tij të palëkundur për mbrojtjen e vlerave demokratike të shtetit.
“Drejtësia dhe zëri im nuk duhet të heshtin përballë kësaj situate. Do të vazhdoj të mbroj interesin e qytetarit dhe të vërtetën e votës së lirë, pavarësisht sfidave, sepse ky reagim tejkalon emrin tim personal – është betejë për të ardhmen demokratike të Republikës”, ka përfunduar ai./lajmishqip.net
