Provinca kanadeze, Ontario do të vendosë një tarifë prej 25 për qind për eksportin e energjisë elektrike në SHBA, gjë që do të shkaktojë fatura më të larta për 1.5 milion familje amerikane që furnizohen me energji nga ky rajon i vendit fqinj.
Siç ka njoftuar kryeministri i Ontarios, Doug Ford, këto tarifa janë një përgjigje e drejtpërdrejtë ndaj presidentit amerikan, Donald Trumpit, i cili ka vendosur tarifa prej 25 për qind për mallrat që importohen nga Kanadaja, shkruajnë mediat.
“Donald Trump e nënvlerëson Kanadanë dhe qytetarët e saj”, deklaroi Ford, duke shtuar se mund të ndalojë edhe eksportin e mineralit të nikelit, i cili nxirret në Ontario.
Kjo është veçanërisht e rëndësishme për industrinë ushtarake amerikane, e cila varet ndjeshëm nga nikeli i importuar nga Kanadaja, me 50 për qind të furnizimeve që vijnë pikërisht nga Ontario.
Përveç kësaj, Ford paralajmëroi se, nëse vendosen tarifa të mëtejshme mbi mallrat kanadeze, ai mund të ndalojë plotësisht eksportin e energjisë elektrike, duke vënë në vështirësi të mëdha qytetarët e shteteve amerikane Minnesota, Michigan dhe New York.
Kujtojmë se Trump ka paralajmëruar se më 2 prill do të shpallë tarifa të reja ndaj Kanadasë, por kjo mund të rezultojë në një efekt të kundërt, siç ka theksuar kryeministri i Ontarios./Telegrafi
