Ish-ambasadori i Britanisë së Madhe në Uashington, Lord Peter Mandelson, ka vlerësuar se Presidenti Donald Trump nuk do të operojë me forcë ushtarake për aneksimin e Groenlandës.
Gjatë një paraqitjeje për BBC, Mandelson potencoi se ndonëse e vlerëson drejtpërdrejtësinë e Trumpit në politikë, ai “nuk është budalla” dhe do të dëgjojë këshilltarët që do ta alarmonin për pasojat fatale që një aventurë e tillë do të kishte për interesat e SHBA-së.
Këto komente pasojnë insistimin e sërishëm të Trumpit se Uashingtoni duhet ta ketë nën zotërim këtë territor gjysmë-autonom të Danimarkës, me qëllim bllokimin e ambicieve të Rusisë dhe Kinës në Arktik. Në anën tjetër, Kopenhaga zyrtare dhe autoritetet në Groenlandë kanë përsëritur se vendi nuk është në shitje, duke paralajmëruar se çdo provokim ushtarak do të godiste themelet e aleancës së NATO-s.
Sipas zhvillimeve të fundit, Sekretari i Shtetit, Marco Rubio, pritet të zhvillojë takime diplomatike në Danimarkë javën e ardhshme. Ndërkaq, një sondazh i fundit danez shpërfaq frikën e 38% të qytetarëve, të cilët besojnë se një skenar pushtimi nga administrata Trump mbetet i mundshëm.
Mandelson ka nënvizuar se rajoni i Arktikut po shndërrohet në një vatër të nxehtë kontestesh, ku SHBA-të synojnë të mbajnë primatin e sigurisë. Groenlanda konsiderohet jetike për sistemet e paralajmërimit të hershëm raketor dhe mbikëqyrjen ushtarake, sikurse edhe për pasuritë nëntokësore që po ekspozohen nga shkrirja e akujve.
Në këtë përplasje, aleatët e NATO-s janë rreshtuar pas Danimarkës, duke insistuar se e drejta për të vendosur për ardhmërinë e territorit u takon ekskluzivisht Kopenhagës dhe Nuuk-ut./lajmishqip.net