Presidenti amerikan Donald Trump ka deklaruar se është gjetur një blerës për operacionet e TikTok në Shtetet e Bashkuara, duke shtuar se identiteti i tyre do të zbulohet “brenda rreth dy javësh”. Gjatë një interviste për Fox News, ai e përshkroi blerësin si “një grup njerëzish shumë të pasur” dhe shprehu besimin se marrëveshja do të marrë miratimin e nevojshëm nga Kina. “Mendoj se presidenti Xi ndoshta do ta bëjë këtë”, tha Trump.
Shitja e detyruar e TikTok u urdhërua vitin e kaluar mes shqetësimeve të politikanëve amerikanë se të dhënat e përdoruesve mund t’i kaloheshin qeverisë kineze. Kompania mëmë e aplikacionit, ByteDance, i ka mohuar vazhdimisht këto akuza. Afati fillestar për shitjen ishte 19 janari, por që atëherë është zgjatur disa herë nga Presidenti Trump. Zgjatja e fundit, e bërë me një urdhër ekzekutiv më 19 qershor, e ka shtyrë afatin deri më 17 shtator.
Komentet e fundit sugjerojnë se një konsorcium po bashkohet për të marrë kontrollin e aplikacionit. Ndër emrat e përfolur si blerës potencialë përfshihen ylli i YouTube, MrBeast, kompania e inteligjencës artificiale Perplexity AI, dhe investitori i “Shark Tank”, Kevin O’Leary. Megjithatë, ByteDance pranoi në prill se ka ende “dallime për shumë çështje kyçe” në bisedimet me qeverinë amerikane.
Në të njëjtën intervistë, Presidenti Trump trajtoi edhe një çështje tjetër ekonomike: përfundimin e pauzës së tarifave amerikane për mallrat e importuara. Ai konfirmoi se afati 90-ditor i dhënë më 9 prill për vendet që të negocionin marrëveshje tregtare, nuk do të shtyhet përtej 9 korrikut. Disa vende, përfshirë Mbretërinë e Bashkuar, tashmë kanë arritur marrëveshje, por të tjerat do të përballen me tarifa të reja.
Presidenti tha se përqindja e tarifës për secilin vend do të vendoset bazuar në deficitin tregtar dhe mënyrën se si ata e trajtojnë SHBA-në. “Do të shqyrtojmë se si na trajton vendi – a janë të mirë, a jo aq të mirë. Disa vendeve, thjesht do t’u dërgojmë një numër të madh”, pohoi ai. Trump shtoi se nuk ka nevojë për takime të mëtejshme pasi “i kemi të gjitha shifrat”. Këto masa, të paralajmëruara në prill, synojnë korrigjimin e marrëdhënieve tregtare dhe rigjallërimin e industrive amerikane, raporton lajmishqip.
