Ish-deputeti i Partisë Demokratike, Ervin Salianji, ka njoftuar zyrtarisht në emisionin “Opinion” se më 23 maj do t’i bashkohet garës për kryetar të PD-së, duke sfiduar hapur liderin aktual, Sali Berisha.
Gjatë analizës së tij, Salianji ka vlerësuar se nën drejtimin e tanishëm, forca kryesore opozitare e ka të pamundur të korrë fitore përballë makinerisë elektorale të Partisë Socialiste.
“Pa asnjë dyshim do të jem në garë më 23 maj. Pas një turi takimesh në terren, kam evidentuar shqetësimet reale të demokratëve që kërkojnë një rrugë të re. Fokusimi im nuk është lufta kundër Berishës, por fitorja e partisë, sepse kjo PD që shohim sot nuk fiton dot. Nuk kam pasur asnjë konflikt personal me të, por vizioni im ndryshon rrënjësisht”, ka pohuar Salianji.
Paralelisht, ish-deputeti ka adresuar edhe pretendimet e Sali Berishës, i cili deklaroi se Salianji e kishte vizituar gjatë kohës së burgimit duke kërkuar garanci politike në këmbim të një qëndrimi kundër Fatmir Xhafajt.
Salianji i ka hedhur poshtë këto pretendime duke i cilësuar si gënjështër, ndonëse ka konfirmuar se takimi ka ndodhur realisht brenda mureve të banesës së kryetarit të PD-së.
Ai sqaroi se vizita është realizuar gjatë një lejeje të rregullt nga burgu, me qëllim diskutimin e disa temave jetike politike.
“Ky reagim buron nga frika e garës së hapur. Kur dikush të vjen në shtëpi, biseda sipas kanunit dhe burrërisë duhet të mbetet aty, por kjo tregon dëshpërim. Unë nuk jam njeri që birësohem politikisht; në një garë të drejtë i dërgoj në pension si këtë, ashtu edhe Ramën. Këto janë trillime që tentojnë të mbulojnë të vërtetat e tjera, siç janë pazaret me vulën e partisë apo lidhjet e dyshimta familjare brenda sistemit të drejtësisë që sot i shërbejnë qeverisë /lajmishqip.net
