Kreu i grupit mercenar rus Wagner, Yevgeny Prigozhin, ka thënë se forcat e saj kanë fituar kontrollin e plotë të qytetit Bakhmut.
Qyteti lindor i Ukrainës ka qenë në qendër të betejës më të gjatë dhe më të përgjakshme të luftës, transmeton Telegrafi.
Prigozhin e bëri pretendimin në një video teksa mbante veshje luftarake përpara një vargu luftëtarësh që mbanin flamuj rusë dhe pankarta të Wagner.
“Sot, në orën 12 të mesditës, Bakhmuti është marrë plotësisht”, tha ai.
Ai shtoi se forcat e tij do të tërhiqen nga Bakhmuti nga 25 maji për pushim dhe ritrajnim.
“Ne morëm plotësisht të gjithë qytetin, shtëpi më shtëpi”, tha ai.
Shpërthime të largëta mund të dëgjoheshin në sfond derisa Prigozhin fliste gjatë videos.
Ushtria ukrainase ka mohuar pretendimet.
Serhiy Cherevaty, zëdhënës i Forcave të Përbashkëta të Ukrainës tha për Sky News: “Kjo nuk është e vërtetë. Luftimet po zhvillohen në qytet”.
Në lidhje me luftimet e ashpra në Bakhmut, zëvendësministrja e mbrojtjes e Ukrainës, Hanna Maliar tha se trupat ukrainase po ruanin një mbrojtje në pjesën jugperëndimore të qytetit.
“Luftime të rënda në Bakhmut. Situata është kritike”, tha ajo në aplikacionin e mesazheve Telegram. “Deri tani, mbrojtësit tanë kontrollojnë disa objekte industriale dhe infrastrukturore në zonë dhe sektorin privat”./Telegrafi