Real Madridi ka konfirmuar zyrtarisht largimin e Xabi Alonsos nga drejtimi i ekipit të parë, duke emëruar Álvaro Arbeloan si pasues të tij. Ndonëse komunikata e klubit flet për një ndërprerje të bashkëpunimit me marrëveshje dypalëshe, detajet e reja tregojnë se iniciativa për largim erdhi ekskluzivisht nga drejtuesit e lartë të klubit.
Xabi Alonso nuk kishte planifikuar dorëheqjen, por gjithçka u përshpejtua pas një telefonate nga drejtuesit, të cilët kërkuan një takim urgjent për të diskutuar të ardhmen. Sipas të përditshmes “Marca”, në këtë takim u bë një analizë e thellë e sezonit, ecurisë së ekipit dhe planeve për “Santiago Bernabeu”.
Sezoni i fundit u karakterizua nga mungesa e stabilitetit dhe një trend negativ në rezultate. Edhe pse Alonso e nisi detyrën me energji dhe një sistem të ri loje, mungesa e harmonisë në dhomën e zhveshjes e bëri të pamundur imponimin e filozofisë së tij. Këto vështirësi u pasuan nga lëndime të shumta të lojtarëve kyç, duke e lënë ekipin pa një identitet të qartë në fushë.
Në këtë klimë tensioni, klubi i sugjeroi trajnerit se ndarja ishte zgjidhja më e mirë për momentin. Alonso e mirëkuptoi pozicionin e bordit dhe, pavarësisht dëshirës për të vazhduar, pranoi propozimin e klubit. Kështu u mbyll një kapitull që premtoi shumë në fillim, por që u kushtëzua nga pengesat e brendshme dhe rezultatet e dobëta. /lajmishqip.net
