Kabineti “Rama 4” ka konkretizuar tashmë paketën e investimeve që përbëjnë shtyllën kurrizore të strategjisë “Shqipëria 2030”, një projekt ky që synon transformimin rrënjësor të infrastrukturës dhe ekonomisë kombëtare.
Nga zhvillimi ekonomik te rrjetet e transportit dhe energjisë, agjenda përfshin gjithsej 114 projekte prioritare në dikasteret kyçe, të cilat janë planifikuar të jetësohen përgjatë periudhës 2027-2029.
Dokumenti i Politikave Prioritare, i sapopublikuar në Fletoren Zyrtare, specifikon një vëllim financiar prej 7.38 miliardë eurosh, duke shpalosur hartën e investimeve ku fokusin kryesor e mban infrastruktura rrugore dhe hekurudhore.
I orientuar drejt forcimit të ndërlidhjes rajonale, transporti mbetet sektori që do të thithë fondet më të mëdha, ku ndërtimi i linjës hekurudhore Durrës-Prishtinë vlerësohet si projekti më strategjik me kosto prej 750 milionë eurosh.
Ky investim hekurudhor synon një ndryshim epokal në qarkullimin e mallrave dhe njerëzve mes dy vendeve, duke shërbyer si një urë lidhëse që pritet të reduktojë kostot e transportit për mbi 50 për qind.
Ndër projektet e tjera me kosto të lartë renditen aksi rrugor Poçem-Memaliaj me një vlerë prej 597 milionë eurosh, si dhe rehabilitimi i linjës hekurudhore Rrogozhinë-kufi me Maqedoninë e Veriut.
Në agjendë figurojnë gjithashtu zgjerimi i autostradës Tiranë-Durrës dhe ndërtimi i segmentit Milot-Balldren, investime këto që synojnë ta shndërrojnë Shqipërinë në një nyje kyçe të tranzitit të mallrave drejt Evropës.
Listën e investimeve energjetike e kryeson hidrocentrali i Skavicës me 800 milionë euro, i ndjekur nga projektet për termocentralin e Vlorës dhe vendosjen e matësve të zgjuar të energjisë, projekt ky që kap vlerën e 330 milionë eurove.
Përveç veprave të mëdha infrastrukturore, “Shqipëria 2030” parashikon një angazhim serioz edhe në sektorët humanë, duke përfshirë investime të rëndësishme në arsim, shëndetësi dhe mbrojtjen sociale të qytetarëve /lajmishqip.net