Dimal Basha ka zbuluar detaje të reja mbi raportet mes krerëve të shtetit, duke pohuar se kryeministri Albin Kurti i kishte propozuar zyrtarisht presidentes Vjosa Osmani një rol kyç brenda kabinetit qeveritar.
Sipas tij, propozimi i Kurtit ishte mjaft konkret: Osmani të mbante postin e zëvendëskryeministres së parë të Kosovës dhe, njëkohësisht, të merrte nën drejtim dikasterin e Ministrisë së Punëve të Jashtme.
Kjo ofertë kishte si synim parësor tejkalimin e ngërçit politik përmes gjetjes së një figure konsensuale. Basha theksoi se, përkundër mospajtimeve të vogla të shfaqura, kryeministri kishte shprehur vullnetin e plotë që ta kishte Osmanin si krahun e tij të djathtë në ekzekutiv.
“Kryeministri i ka propozuar presidentes që të gjejnë një figurë konsensuale për ta tejkaluar krizën. Ai e ka ftuar atë të bëhej zëvendëskryeministrja e parë, duke i ofruar drejtimin e diplomacisë, një fushë me të cilën presidentja është marrë vazhdimisht”, deklaroi Basha gjatë një interviste në RTV Dukagjini.
Më tej, ai shtoi se ky propozim dëshmon vlerësimin e lartë të Kurtit, duke e ftuar atë të renditej si njeriu i dytë në hierarkinë e pushtetit. Sipas tij, vizioni ishte një bashkërendim i plotë dhe i drejtpërdrejtë mes Albin Kurtit dhe Vjosa Osmanit në krye të punëve të vendit./lajmishqip.net