Nemesio “El Mencho” Oseguera Cervantes njihej si bosi gjakatar i narkotrafikut, i cili udhëhiqte Kartelin e Gjeneratës së Re të Jalisco-s (CJNG), një ndër strukturat kriminale më brutale në Meksikë.
Për një kohë të gjatë, ai mbante statusin e njërit prej të arratisurve më të kërkuar, ndërsa SHBA-ja kishte vënë në dispozicion plot 15 milionë dollarë për kokën e tij.
I lindur në korrikun e vitit 1966 në shtetin e Michoacán-it, Oseguera u zhvendos fillimisht në SHBA, ku në vitin 1994 u dënua nga drejtësia kaliforniane për konspiracion në trafikun e heroinës.
Pas përfundimit të dënimit prej tre vitesh burg, ai u rikthye në Meksikë ku shërbeu si polic në Jalisco, përpara se t’u kthehej sërish aktiviteteve të rënda kriminale.
Sipas të dhënave të Departamentit të Thesarit në SHBA, përfshirja e tij e thellë në botën e errët të narkotikëve daton që nga fillimi i viteve ’90.
Ai e themeloi CJNG-në në partneritet me kunatin e tij, Abigael González Valencia, kreun e grupit familjar “Los Cuinis” që operonte në Michoacán.
Agjencia Amerikane kundër Drogës (DEA) vlerëson se “Los Cuinis” funksiononte si krahu financiar dhe logjistik i kartelit, duke menaxhuar një rrjet tejet të ndërlikuar për pastrimin e parave.
Para se të merrte frerët e organizatës së tij, Oseguera shërbente si shef i ekzekutorëve për Kartelin Milenio, asokohe aleat i Sinaloas, ku drejtonte sigurinë dhe operacionet më të dhunshme.
Formimi i CJNG-së rreth vitit 2010 erdhi si pasojë e shpërbërjes së mbetjeve të Kartelit Milenio, bazuar në analizat e detajuara të DEA-s.
Drejtësia amerikane ngriti akuza të shumta ndaj tij, ku në vitin 2022 ai u padit zyrtarisht për komplot në prodhimin dhe shpërndarjen e metamfetaminës, kokainës dhe fentanilit.
DEA e cilëson këtë kartel si burimin kryesor të fentanilit në SHBA, me fitime miliarda dollarësh nga drogat sintetike dhe kokaina, duke u shtrirë në mbi 40 shtete të botës.
“Kjo strukturë ka kryer akte terrori, përfshirë sulme me dronë mbi forcat e rendit dhe përdorim të armatimit ushtarak kundër shtetit”, theksoi Departamenti i Shtetit kur e shpalli kartelin organizatë terroriste në shkurt të vitit 2025./lajmishqip.net