Presidenti i Francës, Emmanuel Macron, mbërriti në Tel Aviv mëngjesin e kësaj të marte, ku pas takimit me homologun izraelit Isaac Herzog në Jerusalem, takoi dhe kryeministrin Benjamin Netanyahu.
Macron shprehu solidaritetin dhe mbështetjen e Francës për Izraelin në luftën kundër terrorizmit.
Ai nënvizoi se i njëjti koalicion ndërkombëtar që ka luftuar grupin e Shtetit Islamik që nga viti 2014 mund të “luftojë” edhe kundër Hamasit.
“Izraeli nuk është i vetëm… Franca është gati që koalicioni që po lufton në Irak dhe Siri kundër IS-it, të luftojë edhe kundër Hamasit”, tha Macron.
Macron paralajmëron gjithashtu grupin militant Hezbollah dhe Iranin kundër hapjes së një fronti të ri në kufirin verior të Izraelit.
Përshkallëzimi i mëtejshëm në veri do të “hapte derën për një zjarr rajonal nga i cili çdo palë do të humbiste”, tha ai.
Ndërkohë që edhe më herët gjatë takimit me presidentin izraelit, Macron u shpreh se fushata ushtarake e Izraelit në Gaza duhet të zhvillohet pa e “zgjeruar këtë konflikt”.
Në vijim Macron pritet të zhvillojë takime me ish-ministrin e mbrojtjes Benny Gantz dhe liderin kryesor të opozitës Yair Lapid.
Sipas Presidencës franceze, Macron do të takohet me banorë që kanë shtetësi izraelite dhe franceze që kanë familjarë të vrarë, por edhe familjarët e pengjeve.