Në një seancë urgjente të Kuvendit të Republikës Srpska (RS), janë miratuar disa projektligje që synojnë moszbatimin e legjislacionit të Bosnjë-Hercegovinës në territorin e këtij entiteti.
Këto ligje prekin institucione kyçe si Gjykata e Bosnje-Hercegovinës, Zyra e Prokurorit të Shtetit, Agjencia e Hetimit dhe Mbrojtjes (SIPA) dhe Këshilli i Lartë Gjyqësor dhe Prokurorial (KLGJP). Zbatimi i tyre në territorin e RS-së tani është i ndaluar, një veprim që, sipas analistëve politikë dhe mediave lokale, përbën një sfidë serioze ndaj rendit kushtetues të shtetit boshnjak.
Projektligji u miratua me 49 vota pro dhe tre kundër, ndërsa në të njëjtën seancë u miratuan edhe ndryshimet në Kodin Penal të RS-së si dhe projektligji për regjistrin e organizatave jofitimprurëse, të dyja me procedurë urgjente.
Ligjet e miratuara vijnë në një kohë tensioni të lartë, pasi vetëm pak ditë më parë, presidenti i RS-së, Milorad Dodik, u dënua me një vit burg nga Gjykata e Bosnje-Hercegovinës, duke iu ndaluar gjithashtu mbajtja e funksioneve publike për gjashtë vjet.
Ministrja e Administratës dhe Vetëqeverisjes Lokale e RS-së, Senka Jujiq, argumentoi se këto ligje synojnë përjashtimin e juridiksionit të institucioneve shtetërore boshnjake mbi RS-në, një hap që konsiderohet si një përpjekje për autonomi më të madhe nga ky entitet.
Ndërkohë, disa deputetë kanë paralajmëruar se miratimi i këtyre ligjeve mund të çojë në ndjekje penale për deputetët dhe autorët e tyre, pasi mund të interpretohen si sulm ndaj rendit kushtetues të Bosnjë-Hercegovinës.
Ky zhvillim pritet të thellojë edhe më tej përplasjet mes qeverisë qendrore dhe udhëheqjes së RS-së, duke rritur rrezikun për një krizë politike dhe institucionale në vend.