Kryeministri në detyrë, Albin Kurti, ka zhvilluar sot një takim të rëndësishëm me ambasadorin e Mbretërisë së Bashkuar në Kosovë, Jonathan Hargreaves. Në fokus të bisedës ishin zgjedhjet e parakohshme të 28 dhjetorit, si dhe domosdoshmëria e konstituimit të shpejtë të institucioneve pas procesit zgjedhor.
Gjatë takimit, Kurti shprehu mirënjohjen e thellë për mbështetjen e vazhdueshme britanike, duke veçuar ndihmën konkrete dhënë Komisionit Qendror të Zgjedhjeve (KQZ). Kjo mbështetje përfshin zhvillimin e softuerit zgjedhor dhe modernizimin e infrastrukturës teknologjike për të garantuar mbarëvajtjen e procesit.
Përveç çështjeve zgjedhore, diskutimi preku edhe prioritetet ekonomike të vendit, investimet kapitale strategjike dhe rrugëtimin e Kosovës drejt integrimeve evropiane.
Në komunikatën zyrtare theksohet se Mbretëria e Bashkuar mbetet një aleat strategjik i pazëvendësueshëm dhe se Kosova është e përkushtuar në forcimin e mëtejmë të këtyre marrëdhënieve të shkëlqyera dypalëshe./lajmishqip.net