Themeluesi i Alibaba dhe Aliexpress, Jack Ma, gjatë një fjalimi të fundit ka dhënë një mesazh optimist për të ardhmen e punës dhe ndikimin e teknologjisë dhe inteligjencës artificiale (IA) në tregun e punës. Ndryshe nga frika e shumë njerëzve se teknologjia do të zëvendësojë fuqinë punëtore, Ma argumenton se IA dhe teknologjia moderne do të krijojnë më shumë vende pune dhe do të nxisin zhvillimin ekonomik.
“Mos mendoni se teknologjia do të marrë vendet e punës së njerëzve, por teknologjia do të zëvendësojë shumë punë të pavlefshme dhe punë koti,” theksoi Ma. Ai solli shembuj nga historia për të treguar se si inovacionet teknologjike kanë ndihmuar në krijimin e vendeve të reja të punës dhe përmirësimin e produktivitetit.
Kur erdhi revolucioni i parë teknologjik me makinat me avull, shumë njerëz u shqetësuan për humbjen e vendeve të punës. Megjithatë, pas 50 vitesh, këto makina krijuan më shumë mundësi punësimi. Po kështu ndodhi edhe me zbulimin e energjisë elektrike, kur shumë kompani kishin frikë për të ardhmen e tyre. Në fakt, elektriciteti jo vetëm që rriti produktivitetin, por edhe krijoi sektorë të rinj ekonomikë.
Sipas Jack Ma, inteligjenca artificiale do të ndjekë të njëjtën trajektore. Ajo do të automatizojë detyrat e përditshme dhe të thjeshta, duke liruar njerëzit për të kryer punë më kreative dhe më të vlefshme. “Inteligjenca Artificiale do të krijojë më shumë vende pune,” përfundoi ai.
Ky vizion pozitiv për të ardhmen e teknologjisë dhe punësimit është një mesazh inkurajues për të gjithë ata që ndihen të shqetësuar për ndikimin e automatizimit në tregun e punës. Në vend që të frikësohemi nga e ardhmja, duhet të shfrytëzojmë mundësitë e reja që teknologjia na ofron, theksoi Jack Ma.
@obama.motivations Jack Ma Motivational video #alibaba #jackma ♬ original sound – Jack Ma