Partia Demokratike e Kosovës ka mirëpritur aktgjykimin e fundit të Gjykatës Kushtetuese, i cili shpall antikushtetuese 13 ligje të miratuara nga Qeveria Kurti më 5 dhjetor 2024. Këto nisma ligjore ishin kontestuar zyrtarisht nga deputetët e Grupit Parlamentar të PDK-së, duke kërkuar mbrojtjen e parimeve demokratike.
Ky vendim përbën një konfirmim të fuqishëm institucional se mazhoranca qeverisëse ka shkelur Kushtetutën e Kosovës. Sipas PDK-së, ky akt dëshmon cenimin e parimit të ndarjes së pushteteve, rolin kushtetues të deputetit dhe Rregulloren e Kuvendit. Aktgjykimi vërteton se procedurat parlamentare janë shfrytëzuar si instrumente të forcës politike, duke anashkaluar mekanizmat demokratikë të vendimmarrjes.
Konstatimet e Gjykatës nxjerrin në pah rëndësinë e veprimit opozitar të PDK-së, e cila ka zgjedhur mjetet ligjore për të mbrojtur rendin kushtetues përballë prirjeve për përqendrim të kundërligjshëm të pushtetit. Partia Demokratike e Kosovës rithekson se Kushtetuta mbetet themeli i shtetit dhe se asnjë shumicë parlamentare nuk mund ta shkelë atë në emër të pushtetit të momentit.
PDK mbetet e palëkundur në angazhimin e saj për të mbrojtur shtetin e së drejtës dhe funksionimin demokratik të institucioneve, duke theksuar se rendi kushtetues duhet të mbrohet çdo ditë, pa marrë parasysh interesat e pushtetit. /lajmishqip.net
