Një pjesëtar i Policisë së Kosovës është sulmuar fizikisht pasditen e djeshme në Prizren, si pasojë e një konflikti të çastit lidhur me një hapësirë parkingu.
Incidenti ka ndodhur më 17 mars, rreth orës 17:20, në rrugën “Kolonel Ahmet Krasniqi”, teksa viktima – një polic jashtë detyrës zyrtare – ndodhej në automjetin e tij privat duke pritur një familjar.
Bazuar në dëshminë e viktimës, pas një mospajtimi verbal me një person tjetër për çështje parkingu, situata ka degjeneruar në dhunë, me ç’rast i dyshuari K.B., rreth 47-vjeçar, e ka goditur atë duke i shkaktuar lëndime në fytyrë.
Zyrtari policor ka pranuar trajtimin e nevojshëm mjekësor në Spitalin Rajonal të Prizrenit, ndërkohë që rasti është denoncuar menjëherë te organet kompetente të rendit.
Personi i dyshuar është shoqëruar pa vonesë në stacionin policor, ku është intervistuar konform procedurave në prani të avokatit të tij mbrojtës.
Me urdhër të Prokurorit të Shtetit, ndaj të dyshuarit është caktuar masa e ndalimit prej 48 orësh, ndërsa institucioni i Prokurorisë është njoftuar zyrtarisht mbi detajet e rastit.
Rasti është kualifikuar si “Lëndim i lehtë trupor”, ndërkohë që njësitet hetimore po punojnë për zbardhjen e plotë të rrethanave të ngjarjes /lajmishqip.net
