Një trup gjykues në Korenë e Jugut ka shqiptuar dënimin me burgim të përjetshëm për ish-presidentin Yoon Suk Yeol, si pasojë e shpalljes jokushtetuese të gjendjes ushtarake gjatë vitit 2024.
Yoon u dënua për abuzim flagrant me autoritetin dhe organizim të kryengritjes, akuza këto që rrodhën nga dekreti i tij i dhjetorit 2024, në një proces ku ish-kreu i shtetit u rrezikua seriozisht edhe nga dënimi me vdekje.
Ish-lideri konservator tentoi ta arsyetonte vendimin e tij si një domosdoshmëri për t’i frenuar liberalët, të cilët i etiketonte si forca “anti-shtetërore” që po bllokonin agjendën e tij përmes shumicës parlamentare.
Megjithatë, kjo rregullore emergjente vetëm sa e futi vendin në një krizë të paprecedentë politike dhe kombëtare.
Organi i akuzës, që kërkoi dënimin me vdekje në janar, argumentoi se “shpallja e jashtëligjshme e gjendjes ushtarake paralizoi institucionet kryesore si Asamblenë Kombëtare dhe Komisionin Zgjedhor, duke goditur rëndë rendin kushtetues demokratik”.
Krahas tij, gjykata shpalli fajtorë dhe dënoi edhe një varg ish-zyrtarësh të lartë ushtarakë dhe policorë që u bënë pjesë e zbatimit të këtij dekreti të jashtëzakonshëm.
Në këtë kuadër, ish-ministri i Mbrojtjes, Kim Yong Hyun, u dënua me 30 vjet burgim për shkak të rolit të tij kyç në planifikimin dhe mobilizimin e forcave ushtarake./lajmishqip.net
