Kryeministri i Maqedonisë së Veriut, Dimitar Kovaçevski, ka njoftuar se është takuar me homologun e tij nga Kosova, Albin Kurtin në Vjenë, ku dy kryeministrat po marrin pjesë në edicionin e 20-të të Forumit Ekonomik të Vjenës në Austri.
“Kemi shkëmbyer mendime për situatën në rajon dhe dialogun ndërmjet Prishtinës dhe Beogradit. Çelësi i progresit të Ballkanit Perëndimor është zgjidhja paqësore e çështjeve të hapura rajonale, si dhe intensifikimi i bashkëpunimit ndërmjet vendeve, i cili do të kontribuojë në stabilitetin e të gjithë rajonit”, ka shkruar në Facebook Kovaçevski.
Ai ka theksuar se me Kurtin ka biseduar edhe për mundësinë e rritjes së bashkëpunimit ekonomik mes dy vendeve.
“Në takimin me kryeministrin e Kosovës, Albin Kurti, biseduam për bashkëpunimin tonë, i cili është gjithëpërfshirës dhe në rritje. Në fokus e kemi vënë në bashkëpunimin ekonomik dhe atë energjetik”, shtoi ai.
