Deputeti i Partisë Guxo, Haxhi Avdyli, i cili njihet për rreshtimin e tij krah presidentes Vjosa Osmani, ka hedhur poshtë në mënyrë kategorike çdo mundësi për t’u rikthyer në radhët e Lidhjes Demokratike të Kosovës (LDK).
Në një prononcim të dhënë për Kanal 10, Avdyli sqaroi se nuk ekziston asnjë plan për rikthimin e tij në LDK. Ai konfirmoi se do të vazhdojë të qëndrojë si pjesë e grupit parlamentar të Lëvizjes Vetëvendosje, pavarësisht faktit se tashmë ka dhënë dorëheqje nga të gjitha pozitat e tij drejtuese brenda partisë Guxo.
Ky reagim i tij vjen vetëm pak orë pasi kryetari i LDK-së, Lumir Abdixhiku, bëri një thirrje publike për bashkim brenda spektrit politik. Kjo deklaratë u interpretua gjerësisht si një ftesë e hapur për rikthimin e presidentes Vjosa Osmani dhe ish-anëtarëve të tjerë që u larguan nga ky subjekt.
Përmes një postimi në rrjetet sociale, Abdixhiku kërkoi bashkimin e asaj që ai e cilësoi si “kampi institucionalist”. Ai theksoi se të gjithë mbështetësit e Republikës dhe orientimit euroatlantik duhet të kenë një shtëpi të përbashkët politike për të ardhmen.
Sipas liderit të LDK-së, koha aktuale kërkon një projekt të përbashkët që i tejkalon ndarjet dhe mosmarrëveshjet e së kaluarës. “Koha kërkon bashkim të institucionalistëve, mbështetësve të Republikës dhe të gjithë udhëtarëve të rrugës euroatlantike”, përfundoi mesazhin e tij Abdixhiku./lajmishqip.net