Ambasadori i Kosovës në Kroaci, Martin Berishaj, pritet të përballet së shpejti me një aktakuzë nga Prokuroria Speciale e Republikës së Kosovës, sipas raportimeve mediatike që citojnë burime brenda organeve të drejtësisë.
Lajmi, i raportuar fillimisht nga gazeta “Nacionale”, pretendon se Prokuroria ka mbledhur prova të mjaftueshme për të ngritur akuza ndaj ambasadorit Berishaj. Thelbi i hetimeve thuhet se përqendrohet në tërheqjen e sasive të mëdha të parave të gatshme, prejardhja e të cilave konsiderohet e dyshimtë.
Prokuroria Speciale ka konfirmuar zyrtarisht se Martin Berishaj është intervistuar të enjten në cilësinë e të dyshuarit. Veprat penale për të cilat ai hetohet janë “Shpëlarje parash”, “Shmangie nga tatimi” dhe “Mosraportim apo raportim i rremë i pasurisë”. Kjo është hera e dytë që ambasadori intervistohet për të njëjtat dyshime, pas një intervistimi të parë rreth një viti më parë.
Nga ana tjetër, mbrojtja e ambasadorit, e përfaqësuar nga avokati Tomë Gashi, i ka mohuar akuzat. Gashi deklaroi se klienti i tij ka ofruar vetëm sqarime dhe e cilësoi rastin si një “aferë të ndërtuar” nga shërbimet sekrete serbe me qëllim dëmtimin e reputacionit të Berishajt dhe të qeverisë së Kosovës.
Ky hetim i ka rrënjët në një skandal financiar të raportuar dy vite më parë nga media sllovene “Planet TV”. Sipas raportimeve të asaj kohe, kompania e Berishajt e regjistruar në Mal të Zi, “MB Consulting”, dyshohet se ka pranuar qindra mijëra euro nga një kompani serbe, të cilat më pas Berishaj dyshohet se i ka tërhequr në para të gatshme dhe i ka transportuar te politikani slloven, Robert Golob. Shuma e përmendur në atë kohë ishte rreth 600,000 euro.
