Gjykata Kushtetuese e Kosovës aktualisht po operon me një përbërje të kufizuar prej vetëm shtatë gjyqtarësh, nga nëntë sa parashihen me ligjin në fuqi. Alarmi bëhet edhe më serioz kur kihet parasysh se pesë prej tyre përmbyllin mandatet e rregullta në mesin e vitit të ardhshëm, duke vënë në rrezik serioz funksionalitetin e këtij institucioni jetik.
Sipas dispozitave të Ligjit për Gjykatën Kushtetuese, procedurat për emërimin e anëtarëve të rinj duhet të nisin muaj më parë. Kryetari i Gjykatës është i obliguar që të njoftojë zyrtarisht Kuvendin e Kosovës gjashtë muaj para skadimit të mandateve, me qëllim që të shmangen vakuument institucionale që mund të dëmtojnë shtetin.
Tani për tani, dy pozitat ekzistuese të lira në këtë gjykatë ende nuk janë plotësuar, duke e lënë institucionin në një udhëkryq të rrezikshëm sa i përket vendimmarrjes ligjore.
Ehat Miftaraj nga Instituti i Kosovës për Drejtësi (IKD) ka tërhequr vërejtjen se kuorumi aktual prej vetëm shtatë gjyqtarësh është tejet i brishtë. Ai shpjegon se nëse qoftë edhe njëri prej tyre mungon për arsye shëndetësore, jep dorëheqje apo mungon për shkaqe të tjera, puna e gjykatës paralizohet plotësisht. Sipas tij, është jetike që Kuvendi të mbetet funksional dhe partitë politike të zgjedhin me kohë kandidatët që plotësojnë kriteret e larta profesionale.
Paralizimi i mundshëm i Kushtetueses, si organi suprem që garanton funksionimin demokratik të shtetit, sipas njohësve të fushës, do të godiste drejtpërdrejt edhe mbrojtjen e të drejtave dhe lirive themelore të qytetarëve.
Në këtë linjë, Anton Nrecaj nga organizata CLARD thekson se ky dëm mund të jetë i pariparueshëm. Ai nënvizon se trajtimi i lëndëve që vijnë nga qytetarët dhe institucionet do të vështirësohej skajshmërisht, duke kujtuar se në të kaluarën vendi është përballur me situata të ngjashme jofunksionaliteti. Sipas tij, zgjidhja mbetet vetëm në vullnetin politik të partive për ta shmangur këtë krizë.
Procesi i përzgjedhjes së gjyqtarëve të rinj është i ndërlikuar dhe zakonisht zgjat me muaj të tërë. Fillimisht, kandidaturat shqyrtohen nga komisionet parlamentare, ndërsa votimi përfundimtar kërkon mbështetjen e deputetëve në seancë plenare para dekretimit nga Presidentja. Duke parë rolin vendimtar që Kushtetuesja ka pasur në zgjidhjen e krizave politike, përfshirë zhvillimet e fundit, ruajtja e kuorumit mbetet një sfidë urgjente për stabilitetin e vendit./lajmishqip.net
