Ministri i Brendshëm i Turqisë njoftoi se tre oficerë policie dhe gjashtë anëtarë të grupit militant “Shteti Islamik” (IS) mbetën të vrarë këtë të hënë gjatë një përleshjeje të ashpër në veriperëndim të vendit. Ky operacion pason bastisjet mbarëkombëtare të javës së kaluar, ku u arrestuan 115 të dyshuar për planifikimin e sulmeve terroriste gjatë festimeve të fundvitit.
Përleshja me armë shpërtheu në Yalova, në jug të Stambollit, kur forcat e rendit ndërhynë në një banesë ku strehoheshin militantët. Sipas ministrit Ali Yerlikaya, gjatë aksionit u plagosën edhe tetë policë dhe një roje nate, por fatmirësisht asnjëri prej tyre nuk është në rrezik për jetën.
Për shkak të rrezikshmërisë, forcat e sigurisë angazhuan njësi speciale nga Bursa, ndërsa zona u izolua plotësisht duke ndërprerë furnizimin me gaz dhe energji elektrike. Pesë shkolla u mbyllën përkohësisht si masë sigurie për civilët. Autoritetet turke kanë rritur vigjilencën, pasi ISIS ka bërë thirrje për sulme gjatë festave, duke rikujtuar tragjeditë e kaluara, si ajo e 1 janarit 2017 në Stamboll ku u vranë 39 persona. /lajmishqip.net