Në një kthesë të pabesueshme të fatit, pensionisti polak Tomasz Wesolowski po ndiqte në televizor lajmet për dronët rusë që kishin shkelur hapësirën ajrore të vendit, pikërisht në momentin kur njëri prej tyre u përplas mbi shtëpinë e tij, duke e kthyer lajmin në një realitet të frikshëm personal.
Në orën 6:30 të mëngjesit të së mërkurës, ndërsa ndodhej në katin e parë të shtëpisë së tij në fshatin Wyryki-Wole, një shpërthim i fuqishëm shkatërroi çatinë dhe një dhomë gjumi. “Sapo kisha ndezur televizorin dhe gjithçka fliste për këtë sulm masiv me dronë,” rrëfen ai. “Pas pak, dëgjova një zhurmë fluturimi dhe papritur ndodhi shpërthimi. Dritat ranë nga tavani. Vrapova jashtë dhe pashë tmerr: e gjithë çatia ishte bërë copë.”
Bashkëshortja e tij, Alicja, vrapoi jashtë e tmerruar, duke parë avionin ushtarak mbi kokë dhe duke u frikësuar se do të bombardoheshin. Për fat të mirë, çifti nuk pësoi lëndime. Fqinja e tyre, Urszula Zaprzaluk, përjetoi të njëjtin tmerr. “Dëgjova një zhurmë që m’u duk si shpërthim. Këmbët më dridheshin,” kujton ajo. Nga ballkoni, ajo pa se shtëpisë së fqinjëve i mungonte çatia, ndërsa oborri i saj ishte mbuluar me mbeturina.
“Thjesht kam frikë nga kjo luftë,” tha Zaprzaluk, duke kujtuar historitë e tmerrshme të së ëmës për Luftën e Dytë Botërore dhe duke shtuar se “është më mirë të mos na vijë kurrë këtu.”
Incidenti ishte pjesë e një operacioni të gjerë të mbrojtjes ajrore polake. Autoritetet konfirmuan se disa dronë ishin rrëzuar pasi kishin hyrë ilegalisht në territorin polak gjatë një sulmi rus ndaj Ukrainës. Në total, mbetjet e 12 dronëve dhe një rakete u gjetën në lokasiione të ndryshme në të gjithë vendin. /lajmishqip.net
