Lidhja Demokratike e Kosovës (LDK) ka shprehur revoltë të hapur pas vendimit të pushtetit për të bllokuar 21 amendamentet që grupi i tyre parlamentar kishte propozuar për buxhetin shtetëror.
Në një paraqitje para mediave, Shefja e deputetëve të LDK-së, Jehona Lushaku, e shoqëruar nga deputetët Fadil Hadërgjonaj dhe Besian Mustafa, shpërfaqi listën e projekteve të refuzuara duke vënë në pah impaktin e tyre te qytetarët.
“Jemi mbledhur këtu në emër të grupit tonë parlamentar për të denoncuar injorimin e 21 propozimeve tona buxhetore. Këto nisma ishin thelbësore për mirëqenien publike dhe i dërguam në Kuvend me shpresën se pozita do të reflektonte mbi peshën e tyre zhvillimore. Më lejoni të numëroj disa nga këto pika ku pushteti dështoi të tregojë ndjeshmëri politike.
Mazhoranca ka refuzuar rritjen e financimit për Universitetin e Prishtinës dhe ka dalë kundër mësimit tërëditor, një kërkesë emergjente kjo për nxënësit dhe familjet kosovare. Kanë bllokuar unazën dhe spitalin e kryeqytetit, investime që do të lehtësonin ndjeshëm qarkullimin dhe mbingarkesën në QKUK. Janë hedhur poshtë projekte për ujësjellës në Lipjan, Skenderaj e Istog, si dhe plani modernizues për digjitalizimin dhe integrimin e inteligjencës artificiale në shkolla. Po ashtu, u refuzua harta vizuale e turizmit dhe digjitalizimi i trashëgimisë sonë kulturore,” deklaroi Lushaku.
Deputetja potencoi se jashtë planeve mbetën edhe investimet në KEK, ndërtimi i një shkolle në Kaçanik dhe salla e shumëpritur koncertale.
“Pushteti bllokoi projektet për KEK-un, shkollën e re në Kaçanik dhe sallën koncertale, duke bërë që ngjarjet tona kulturore të mbeten ende peng i sallave të edukatës fizike. I drejtohemi qytetarëve me keqardhje për këtë barrikadim të qeverisë ndaj projekteve si mësimi tërëditor, i cili do të rriste cilësinë në arsim dhe do të zbatonte kurrikulat që sot mbeten vetëm në letër. Ironikisht, pikërisht ky projekt ishte premtim kyç i partisë në pushtet, por në momentin e votimit ata i kthyen shpinën kauzës së tyre. Ne do të bëjmë përpjekjen e fundit në seancë, por pa përfshirjen e këtyre amendamenteve, vota jonë për këtë buxhet nuk do të ekzistojë,” përmbylli Lushaku./lajmishqip.net