Presidentja e Kosovës, Vjosa Osmani, ka zhvilluar një takim me Kryeministren e Islandës, Kristrún Frostadóttir, ku në qendër të vëmendjes ishte forcimi i pozitës ndërkombëtare të Kosovës dhe projektet me interes të përbashkët.
Në këtë takim bilateral, Presidentja Osmani i shprehu mirënjohjen e thellë homologes së saj për atë që e cilësoi si “mbështetje të palëkundur” të Islandës, veçanërisht për procesin jetik të anëtarësimit të vendit në Këshillin e Evropës. Të dy lideret diskutuan gjithashtu hapat konkretë për të avancuar bashkëpunimin mes dy shteteve.
Përmes një postimi zyrtar, Presidentja Osmani konfirmoi thelbin e bisedimeve.
“Në takimin me Kryeministren e Islandës, Kristrún Frostadóttir, shpreha mirënjohjen për mbështetjen e palëkundur që Islanda i ka dhënë Kosovës në forcimin e pozitës sonë ndërkombëtare, në veçanti për procesin e anëtarësimit në Këshillin e Evropës. Biseduam gjithashtu për projekte me interes të ndërsjellë dhe për mundësitë e avancimit të bashkëpunimit ndërmjet dy vendeve tona”, ka shkruar Osmani./lajmishqip.net
