Ish-Presidenti i Kosovës, Hashim Thaçi, i është drejtuar trupit gjykues në Hagë këtë të mërkurë, duke theksuar prerë se drejtësia e vërtetë nuk mund të vendoset përmes “ndjekjes penale të njerëzve të pafajshëm”.
Gjatë procesit gjyqësor që po ndiqet me vëmendje nga agjencia Reuters, Thaçi dhe tre ish-drejtuesit e tjerë të UÇK-së akuzohen për krime lufte dhe persekutim gjatë luftës çlirimtare të viteve 1998-99. Megjithatë, të gjithë të akuzuarit i kanë hedhur poshtë këto pretendime në mënyrë kategorike që nga fillimi.
“Drejtësia për viktimat nuk nderohet duke ndjekur penalisht të pafajshmit; pajtimi nuk arrihet përmes proceseve selektive dhe të bazuara në përkatësi etnike,” deklaroi Thaçi në fjalën e tij përfundimtare. Ky fjalim vjen vetëm pak kohë përpara vendimit të gjykatës, i cili pritet të shpallet brenda tre muajve.
Thaçi, tashmë 57 vjeç, i quajti pretendimet e prokurorisë për një fushatë të organizuar dhune si “të pavërteta, krejtësisht absurde dhe thellësisht ofenduese”. Ekipi i tij mbrojtës ka insistuar vazhdimisht se nuk ekziston asnjë provë që e lidh drejtpërdrejt atë me krimet e supozuara, apo që vërteton kontrollin e tij hierarkik mbi komandantët e tjerë në terren.
Pasi kërkuan një dënim prej 45 vjetësh burg për krerët e UÇK-së, prokurorët pretendojnë se gjatë viteve 1998-99 janë vrarë mbi 100 kundërshtarë politikë në qendrat e ndalimit. Thaçi, Veseli, Krasniqi dhe Selimi u arrestuan në vitin 2020 dhe që atëherë po përballen me këtë proces maratonë në dhomat e specializuara.
Në një kontekst ku mbi 13,000 njerëz humbën jetën nga represioni i forcave të Millosheviqit, udhëheqësit e UÇK-së vazhdojnë të shihen si heronj të lirisë në Kosovë. Kjo u dëshmua edhe të martën, ku mijëra qytetarë u mblodhën në Prishtinë në një marsh masiv në mbështetje të ish-komandantëve. /lajmishqip.net