Në një mesazh të rëndësishëm me rastin e Ditës së Bashkimit të Gjermanisë, Ambasadori Karl Bergner ka rikonfirmuar mbështetjen e palëkundur të Berlinit për rrugëtimin evropian të Shqipërisë, duke theksuar se Gjermania qëndron si një partner strategjik afatgjatë. Ai vlerësoi progresin e arritur, veçanërisht hapjen e pesë kapitujve të negociatave, dhe nënvizoi se mbështetja gjermane për reformat kyçe, institucionet dhe luftën kundër korrupsionit do të jetë e vazhdueshme.
Ambasadori dërgoi një mesazh të qartë për klasën politike dhe sistemin e drejtësisë: “Qytetarët shqiptarë presin bashkëpunim konstruktiv në parlament, drejtësi të pavarur dhe një luftë të vazhdueshme kundër korrupsionit.” Në këtë kontekst, ai vlerësoi posaçërisht punën e SPAK dhe të atyre gjyqtarëve që, sipas tij, “i rezistojnë presionit publik dhe mbrojnë shtetin ligjor”.
Mbështetja gjermane, e cila shtrihet në 37 vite bashkëpunim, mbetet thelbësore edhe për zhvillimin ekonomik përmes projekteve të GIZ dhe KfW, që synojnë ndihmën për shtresat më të prekura dhe bizneset e vogla rurale. Sipas ambasadorit, një fushë tjetër me potencial të jashtëzakonshëm është turizmi i qëndrueshëm, gjë që u dëshmua nga paraqitja mbresëlënëse e Shqipërisë në Panairin Ndërkombëtar të Turizmit në Berlin.
Duke theksuar se zgjerimi i suksesshëm i BE-së bazohet në vlera të përbashkëta si demokracia dhe sundimi i ligjit, Bergner konfirmoi se Gjermania do të vijojë të ofrojë mbështetje të gjithanshme, nga infrastruktura dhe arsimi profesional, te energjia e qëndrueshme dhe lufta kundër ndryshimeve klimatike.
Në përmbyllje, ambasadori i ftoi qytetarët t’i bashkohen festimeve të Javës së Kulturës Gjermane, e cila nis më 3 tetor në Pazarin e Ri në Tiranë me një festë të hapur që do të ndërthurë muzikën, filmin dhe atmosferën tradicionale të Oktoberfest-it./lajmishqip.net
