Ish-komandanti i Ushtrisë së Republikës Sërpska, Ratko Mlladiq, i dënuar me burgim të përjetshëm për gjenocid, krime kundër njerëzimit dhe krime lufte në Bosnjë-Hercegovinë, u varros të hënën në Beograd me nderime ushtarake dhe në praninë e zyrtarëve të lartë serbë. Ceremonia u shoqërua me të shtëna nderi, prani të pjesëtarëve të Ushtrisë së Serbisë dhe fjalime në të cilat u lartësua figura e tij. Mes të pranishmëve kishte ministra të Qeverisë së Serbisë dhe udhëheqës politikë të Republikës Sërpska, ndërsa turma brohoriti emrin e Mlladiqit dhe e përcolli arkivolin me duartrokitje. Megjithatë, Komisioni Evropian deklaroi se ceremoninë nuk e konsideron varrim me nderime shtetërore.
Bashkimi Evropian, në ditën e varrimit të Mlladiqit, përsëriti qëndrimin se nuk ka vend për glorifikimin e kriminelëve të luftës, mohimin e gjenocidit dhe revizionizmin, duke bërë thirrje që fokusi të jetë te viktimat dhe pajtimi në rajonin e Ballkanit Perëndimor.
Megjithatë, reagim shkaktoi deklarata e zëdhënëses së Komisionit Evropian, Paula Pinho, e cila tha se Brukseli nuk e konsideronte ceremoninë si funeral me nderime shtetërore, pavarësisht pranisë së ushtrisë dhe zyrtarëve qeveritarë.
“Qëndrimi ynë është shumë i qartë. Nuk ka vend për glorifikimin e kriminelëve të luftës apo të atyre që mohojnë gjenocidin, ose të atyre që bien ndesh me vlerat më themelore evropiane. Fakti është se ne kishim dëgjuar se ishte planifikuar një varrim me nderime shtetërore dhe kjo nuk ka ndodhur”, deklaroi Pinho.
Gjatë konferencës për media në Bruksel, gazetarët kërkuan sqarime se mbi çfarë baze Komisioni Evropian kishte arritur në përfundimin se ceremonia nuk kishte karakter shtetëror, ndërkohë që në të morën pjesë ministra të Qeverisë së Serbisë, pjesëtarë të ushtrisë dhe ishin të pranishme simbole shtetërore. Pinho nuk dha një shpjegim më të hollësishëm, duke theksuar se Serbia vendos vetë për mënyrën e organizimit të funeralit.
E pyetur nëse Beogradi mund të përballet me pasoja për glorifikimin e Mlladiqit, zëdhënësja e Komisionit Evropian tha se qëndrimi i Brukselit u është komunikuar qartë autoriteteve serbe, ndërsa për hapat eventualë të mëtejshëm do të vendoset në vazhdim.
Në qarqet diplomatike është ngritur gjithashtu çështja nëse zhvillimet e fundit mund të ndikojnë në marrëdhëniet ndërmjet Brukselit dhe Beogradit. Komisioni Evropian nuk ka konfirmuar nëse Serbia do të përfshihet në turneun e ardhshëm të presidentes Ursula von der Leyen në Ballkanin Perëndimor, duke thënë se programi ende është duke u përgatitur. Për këtë arsye, nuk mund të konfirmohet se një anulim eventual i vizitës në Serbi është vendosur apo se do të përdoret si masë ndëshkuese. /lajmishqip.net
