Kuvendi i Kosovës ka shkelur të drejtat e mbi 90 mijë zyrtarëve publikë, pasi ka reduktuar përqindjen e shtesës mbi përvojën e punës për 15 vitet e para nga 0.5 për qind në 0.25 për qind. Kështu u tha në diskutimin publik, të organizuar nga Instituti i Kosovës për Drejtësi.
Aty u tha se nëse Kuvendi nuk vepron, zyrtarët publikë e kanë të drejtën që të kërkojnë kompensim në gjykatë. Përpos vërshimit të gjyqësorit me mbi 90 mijë lëndë, atëherë nga buxheti i shtetit duhen të paguhen edhe shpenzimet procedurale dhe kamata ligjore.
Gëzim Shala, hulumtues i lartë në Institutin e Kosovës për Drejtësi (IKD), tha se nëse Kuvendi nuk vepron në drejtim të realizimit të së drejtës së zyrtarëve publikë për kompensim për përvojën e punës, ata kanë të drejtë të kërkojnë mbrojtje gjyqësore, duke kërkuar kompensimin e dëmit për shkak të mosveprimit të tyre.
“Në këtë situatë, tashmë zyrtarët publikë kanë pësuar dëm. Nëse Kuvendi nuk vepron, zyrtarët publikë e kanë të drejtën që të kërkojnë mbrojtje gjyqësore, duke kërkuar përmes Gjykatës kompensimin e dëmit që iu është shkaktuar nga mosveprimi i Kuvendit”, tha Shala, teksa theksoi se kjo situatë mund të dërgojë deri në vërshimin e gjykatës me një numër lëndësh që mund të arrijë deri në 90 mijë raste të reja.
“Nëse Kuvendi nuk vepron dhe zyrtarët publikë detyrohen t’i drejtohen gjykatës, potenciali në këtë rast është se gjykatat do të vërshohen me rreth 90 mijë lëndë të reja, të cilat do të duhet t’i trajtojnë një për një”, shtoi Shala.
Gjithashtu, sipas Shalës, përpos ndikimit që këto lëndë do të kenë në efikasitetin e punës së gjykatës, shpenzimet lidhur me procedurat gjyqësore do të bien në barrë të buxhetit të shtetit.
“Në bazë të një kalkulimi të përgjithshëm, nga buxheti i Kosovës do të shpenzohen 35,770,502 euro për shpenzime procedurale, pa përfshirë kamatën ligjore dhe shpenzimet e mundshme përmbarimore”, tha Shala.
Përparim Gruda, deputet në ardhje i Partisë Demokratike të Kosovës (PDK) tha se është e paimagjinueshme që një vend demokratik nuk i respekton vendimet e Gjykatës Kushtetuese.
Sipas tij, Kuvendi nuk po zbaton aktgjykimin e Kushtetueses, jo për shkak të mungesës së mundësive ligjore apo teknike, por sepse lideri nuk dëshiron ta bëjë një gjë të tillë.
“Kjo është një situatë e papranueshme për një vend që pretendon të jetë demokratik dhe të respektojë shtetin e së drejtës. Kam thënë edhe në një tryezë tjetër se kur trajtojmë problemet e moszbatimit të aktgjykimeve kushtetuese, nuk kemi të bëjmë thjesht me një bojkot nga ana e qeverisë, por me një qasje të strukturuar që e konsideron sundimin e ligjit si të negociueshëm”, tha Gruda.