Presidenti Donald Trump tha se Shtetet e Bashkuara do të mbajnë një prani të fortë ushtarake në Poloni gjatë një takimi të mërkurën me Karol Nawrocki-n, presidentin e ri të aleatit amerikan në Evropë.
Trump kishte ndërmarrë hapin e pazakontë të mbështetjes së Karol Nawrocki-t në zgjedhjet presidenciale në fillim të këtij viti dhe ndërsa udhëheqësit ishin ulur në Shtëpinë e Bardhë, Trump tha se marrëdhënia SHBA-Poloni ka qenë gjithmonë e fortë, por “tani është më mirë se kurrë”.
Kur u pyet nga një gazetar nëse SHBA-të planifikonin të vazhdonin të vendosnin trupa në Poloni, Trump tha se po dhe se “ne do të vendosim më shumë atje nëse ata duan”.
“Ne do të qëndrojmë në Poloni. Ne jemi shumë të lidhur me Poloninë”, ka thënë Trump, shkruajnë mediat e huaja, përcjell Telegrafi.
Vizita në Uashington është udhëtimi i parë jashtë vendit i Nawrocki-t që nga marrja e detyrës muajin e kaluar.
Ish-boksieri amator dhe historiani, i cili u mbështet nga partia konservatore Ligj dhe Drejtësi, shpresonte të thellonte marrëdhënien e tij me Trump në një moment të tensionuar për Varshavën.
Nawrocki falënderoi Trumpin për mbështetjen e tij dhe, në një shenjë respekti për lidhjet midis vendeve të tyre, u dha një përshëndetje të veçantë miliona polako-amerikanëve në SHBA.
“Këto marrëdhënie për mua, për Poloninë, për polakët, janë shumë të rëndësishme”, tha Nawrocki.
Ai shtoi se këto lidhje bazohen në vlerat e përbashkëta të pavarësisë dhe demokracisë.
Ndërsa Trump tha se ishte krenar që kishte mbështetur Nawrockin dhe e lavdëroi atë për fitoren në zgjedhje.
Trump është gjithnjë e më i frustruar nga pamundësia e tij për të bindur presidentin rus Vladimir Putin dhe presidentin ukrainas Volodymyr Zelensky të ulen për bisedime të drejtpërdrejta që synojnë përfundimin e luftës.
Muajin e kaluar, Trump u takua me Putinin në Alaska dhe më pas me Zelenskyn dhe disa udhëheqës evropianë në Shtëpinë e Bardhë.
Presidenti republikan doli nga ato angazhime i bindur se do të ishte në gjendje të organizonte shpejt bisedime të drejtpërdrejta midis Putinit dhe Zelenskyt dhe ndoshta bisedime trepalëshe në të cilat ai do të merrte pjesë.
Dhe të mërkurën, Putin tha se do të ishte i përgatitur të takohej me Zelenskyn, me kusht që takimi të zhvillohej në Moskë. Kievi e hodhi poshtë shpejt këtë propozim.
“Ndoshta ata duhet të luftojnë edhe pak”, tha Trump në një intervistë me gazetën konservatore Daily Caller të botuar gjatë fundjavës. “E dini, thjesht vazhdoni të luftoni – budallallëk, vazhdoni të luftoni”.
