Numri i të vdekurve nga sulmet ajrore izraelite mbi pozicionet e rebelëve Houthi në Jemen është rritur në 46, ndërsa të plagosurit kanë arritur në 165, sipas deklaratës së përditësuar nga zëdhënësi i Ministrisë së Shëndetësisë së Houthi-ve, Anees Alasbahi.
Sipas tij, bilanci mbetet paraprak dhe mund të ndryshojë në orët e ardhshme.
Kjo valë sulmesh pason një operacion të paprecedentë të Izraelit para dy javësh, kur u vranë 12 udhëheqës të lartë të Houthi-ve. Të mërkurën në mëngjes, ushtria izraelite njoftoi se kishte goditur “objektiva ushtarake” në kryeqytetin Sanaa dhe në provincën veriore Jawf, raporton Reuters.
Edhe pse autoritetet izraelite nuk kanë dhënë detaje konkrete mbi objektivat e goditura, ato theksuan se këto aksione janë pjesë e një fushate të zgjeruar kundër kërcënimeve të grupeve të mbështetura nga Irani në rajon, përfshirë Houthi-t.
Ky zhvillim përfaqëson një tjetër përshkallëzim të konfliktit në Lindjen e Mesme, në një kohë kur tensionet midis Izraelit dhe aleatëve të Iranit në Jemen, Liban dhe Siri po rriten ndjeshëm./lajmishqip.net
