Një analizë e imazheve të reja satelitore ka zbuluar pasojat e dukshme të sulmeve ajrore amerikane në impiantin bërthamor Fordow në Iran, ku janë identifikuar të paktën gjashtë kratere të mëdha, çka dëshmon për përdorimin e bombave të fuqishme që depërtojnë thellë nën tokë.
Sipas analizës së CNN, bazuar në imazhet e ofruara nga kompania Maxar, krateret janë të qarta dhe të dallueshme përgjatë një kreshte mali, direkt mbi kompleksin nëntokësor. Ky pozicionim sugjeron një përpjekje të planifikuar për të goditur strukturat e fshehura thellë nën male.
Gjetjet nga imazhet u konfirmuan nga një zyrtar amerikan, i cili i tha CNN se Shtetet e Bashkuara përdorën avionë bombardues B-2 për të hedhur dhjetëra bomba masive të tipit “bunker-buster”. Këto armë janë projektuar posaçërisht për të depërtuar në thellësi para se të shpërthejnë, duke qenë thelbësore për të shënjestruar një objektiv si Fordow.
Përveç kratereve, imazhet satelitore tregojnë edhe një zonë të gjerë të shpatit të malit të mbuluar me një shtresë hiri, si pasojë e sulmeve. Megjithatë, përkundër dëmeve të dukshme në sipërfaqe, shkalla e saktë e shkatërrimit në ambientet nëntokësore të centralit mbetet ende e paqartë, raporton lajmishqip.
