Ambasada e Shteteve të Bashkuara të Amerikës në Prishtinë ka përcjellë urimet më të ngrohta për qytetarët e Kosovës me rastin e festave, duke reflektuar mbi arritjet kyçe dhe bashkëpunimin e ngushtë gjatë vitit 2025.
Lindsay Jagla, përfaqësuese e Ambasadës, vuri në dukje se ky vit dëshmoi një përkushtim të palëkundur për një të ardhme më të begatë. “Në mbarë vendin kemi parë bashkëpunim dhe një dëshirë të përbashkët për të ndërtuar një mjedis më të sigurt për të gjithë,” deklaroi ajo.
Në rrafshin ekonomik, zyrtari Micah Savige vlerësoi partneritetin me bizneset vendore, duke veçuar pjesëmarrjen në Samitin SelectUSA dhe zgjerimin e markave prestigjioze si RcCola, Popeyes dhe Apple Pay. Sipas tij, këto sinergji po fuqizojnë ndjeshëm sektorin privat dhe po krijojnë mundësi të reja zhvillimi.
Ndërkaq, Kevin Miles, drejtor i INL-së, u ndal te suksesi në sferën e sigurisë, duke përmendur operacionet e ekstradimit, sigurinë kibernetike dhe luftën kundër krimit të organizuar. Kontributi ushtarak u lartësua nga David Venez, i cili theksoi rëndësinë e pjesëmarrjes së Kosovës në ushtrimin “Defender 25” dhe stërvitjet e përbashkëta me Gardën Kombëtare të Iowas.
Në mbyllje të këtij bilanci, e ngarkuara me punë e SHBA-së, Anu Prattipati, uroi qytetarët për një vit të qetë: “Gëzuar Festat dhe Gëzuar Vitin e Ri!”./lajmishqip.net