Uashingtoni ka ngritur tonet ndaj Karakasit, pasi presidenti amerikan Donald Trump njoftoi më 16 dhjetor një “bllokadë të plotë” ndaj tankerëve të sanksionuar që hyjnë ose dalin nga Venezuela.
Sipas raportimeve, masa synon të godasë burimin kryesor të të ardhurave të qeverisë së Nicolás Maduro-s dhe lidhet me pretendime për krim të organizuar, trafik dhe “vjedhje pasurish”. Megjithatë, detajet praktike se si do të zbatohet bllokada mbeten të paqarta, ndërsa kritikët në SHBA paralajmërojnë debate ligjore dhe politike për kompetencat e një veprimi të tillë.
Ky zhvillim vjen vetëm pak ditë pasi SHBA raportoi se ka sekuestruar një tanker të sanksionuar pranë brigjeve të Venezuelës, lëvizje që i dha një shtysë të menjëhershme çmimit të naftës dhe rriti frikën për përshkallëzim në rajon.
Për tregjet globale, sinjali është i qartë: çdo pengesë në eksportet venezueliane mund të reflektohet në çmime, zinxhir furnizimi dhe kosto energjie. Kjo pritet të ketë efekt edhe në Evropë, përfshirë Ballkanin, ku çdo lëkundje e naftës ndjehet shpejt në çmimet e transportit dhe shportën e konsumatorit./lajmishqip.net