Forca e Sigurisë së Kosovës (FSK) ka pranuar një kontingjent të ri autoblindash të prodhimit amerikan, duke shtuar kapacitetet e saj operacionale. Lajmin e ka konfirmuar Ministria e Mbrojtjes në një përgjigje për mediat. Ministria nuk ka dhënë detaje specifike për numrin e mjeteve apo për destinimin e tyre, por ka bërë të ditur se priten edhe dërgesa të tjera në të ardhmen. “Konfirmojmë se kemi pranuar disa autoblinda, prodhim i SHBA-së, të cilat janë prokuruar bazuar në planin bilateral të blerjeve shtet-më-shtet dhe pritet të pranojmë edhe të tjera deri në përfundim të këtij aktiviteti,” citohet në përgjigjen e ministrisë. “Këto janë informacionet që mund të ndajmë me publikun në këtë fazë”, theksohet më tej në njoftimin zyrtar.
Këto mjete të reja ushtarake tashmë janë vendosur në bazat përkatëse të Forcës së Sigurisë së Kosovës, raporton lajmishqip.
