Pronari i lokalit ku ndodhi vrasja ishte në arrest shtëpiak – gjithçka që dihet nga ngjarja që tronditi Tiranën ku u plagos edhe një fëmijë

1 minute, 54 seconds Read

Një ngjarje e rëndë ka tronditur Tiranën pasditen e së dielës.

Nga të shtënat me armë në drejtim të një lokali tek zona e njohur si “Don Bosko” mbetën të vrarë një grua dhe 5 persona të tjerë u plagosën, në mesin e tyre edhe një fëmijë 10 vjeç.

Rreth orës 21:05 minuta persona ende të paidentifikuar kanë qëlluar me armë nga jashtë drejt lokalit duke lënë të vrarë banakieren e lokalit, shtetasen Mimoza Paja ndërsa janë plagosur Sait M.
50 vjeç; Astrit M. 42 vjeç, Emanuel S. 47 vjeç, Ermir. B, 45 vjeç dhe Genc Sh. 55 vjeç.

Gjithashtu është lënduar në dorë nga ciflat e xhamave, një e mitur 10-vjeçare, informoi policia e Tiranës.

Atentati ndodhi në një lokal që sipas policisë i përket shtetasit Fatjon Murati, person me precedentë penal.

Raportohet se shënjestra e këtij atentati të ketë qenë xhaxhai i Fatojn Muratit, Sahit Murati i cili ka mbetur i plagosur.

Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë janë duke u kryer punë intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.

Sipas raportimeve nga mediat në Shqipëri, thuhet se pronari i lokalit ku ndodhi ngjarja e rëndë, Fatjon Murati, kishte qenë në arrest shtëpiak, pasi që gjykata i kishte caktuar kohë më parë këtë masë sigurie.

Ndërkohë, disa ditë pasi u ndalua, me vendim të gjykatës atij iu sekuestrua pasuria e paluajtshme me vlerë 5 milionë euro.

Ai ishte ndaluar nga policia në makinë me Endrit Doklen, i cili dyshohet se ka lidhje me vrasjen që ndodhi një vit më parë në Fushë-Krujë.

Murati është ndaluar më parë nga autoritetet italiane, si i dyshuar për blerje të mallrave të vjedhura, posedim ilegal të armëve dhe të lëndëve narkotike.

Por pas ngjarjes së rëndë që ndodhi mbrëmë në lokalin e tij, policia nuk e gjeti në banesë Muratin.

Ende nuk ka informacion nëse Murati është larguar nga banesa mbrëmjen e djeshme menjëherë pas ngjarjes, apo është “arratisur’ më herët. /Telegrafi

Publikime te ngjashme