fbpx

Më në fund Nagavci takon përfaqësuesit e SBAShK-ut, u kërkon që mësimi të nisë të hënën

HomeLajmeKosovë

Më në fund Nagavci takon përfaqësuesit e SBAShK-ut, u kërkon që mësimi të nisë të hënën

Ministrja e Arsimit, Arbërie Nagavci, ka takuar sot përfaqësues të Sindikatës së Bashkuar të Arsimit, Shkencës dhe Teknologjisë (SBAShK) të cilëve u ka bërë thirrje që mësimi të fillojë nga e hëna e javës së ardhshme.

“Me ftesë të ministres së Arsimit, Shkencës, Teknologjisë dhe Inovacionit, Arbërie Nagavci, sot janë pritur në një takim në MAShTI, përfaqësues të Sindikatës së Bashkuar të Arsimit, Shkencës dhe Kulturës (SBAShK-ut)”, thuhet në njoftimin e MAShTI-t.

“Ministrja Nagavci theksoi që secili prej nesh e kemi obligim moral e ligjor të sigurohemi për mirëqenien e fëmijëve dhe garantimin e së drejtës së tyre për arsim. Me këtë rast, ajo kërkoi nga përfaqësuesit e SBASHK-ut, që mësimdhënësit që nga e hëna të fillojnë procesin mësimor ndërkohë që dialogu do të vazhdojë”.

Nagavci e ka potencuar që nga kjo grevë po e pësojnë rreth 320 mijë nxënës, teksa nga SBAShK-u kanë thënë që shtesa prej 50 eurosh e ndarë nga Qeveria nuk mjafton.

“Ndonëse greva është shpallur nga BSPK për 84 mijë zyrtarë publikë, ajo tha se pjesa më e madhe e punëtorëve janë në vendet e tyre të punës, kurse ata që po pësojnë nga greva e shpallur janë rreth 320 mijë nxënës që kanë mbetur jashtë bankave shkollore”.

“Ministrja i informoi përfaqësuesit e SBASHK-ut në lidhje me masat e fundit të Qeverisë për pakon prej 150 milionë eurosh, ku përfshihen edhe mësimdhënësit, si dhe veprimet që i ka ndërmarrë MAShTI sa i përket përmirësimit të kushteve të mësimdhënësve”.

“Ndërkaq, përfaqësues të Sindikatës kanë thënë se shtesa prej 50 eurosh e ndarë nga Qeveria nuk është e mjaftueshme dhe duhet të gjendet një zgjidhje për realizimin e kërkesës së tyre për 100 euro”.

Ministrja ka kërkuar nga grevistët që ata të kthehen në shkolla dhe mësimi të fillojë nga e hëna.

“Ministrja Nagavci tha se MAShTI është për dialog dhe që Sindikata duhet të reflektojë në arritjen e një marrëveshje duke mos përdorur masa ekstreme”.

“Ndërkaq, ajo shtoi se diskutimet me SBAShK-un do të vazhdojnë sikur deri më tani. Ministria e Arsimit, Shkencës,Teknologjisë dhe Inovacionit edhe njëherë bënë thirrje që, nga e hëna, të gjithë mësimdhënësit të jenë në shkolla dhe të fillojë procesi i rregullt mësimor”.

x