Legjenda e boksit, Vitali Klitschko nis stërvitjet me rezervistët ushtarakë të Ukrainës

Ish-kampioni i botës në kategorinë e peshave të rënda në boks, Vitali Klitschko, i cili aktualisht është kryetar i Kievit, i është bashkuar ushtrisë së Ukrainës dhe u ka kërkuar funksionarëve të tjerë që ta bëjnë të njëjtën gjë.

50-vjeçari ka nisur trajnimin me rezervistët ushtarakë të Ukrainës në mes të tensioneve në rritje midis vendit të tij dhe Rusisë.

“Shumë prej nesh e kanë kryer shërbimin ushtarak dhe ato aftësi duhet të riktheheshin. Mendoj se një trajnim i tillë është thelbësor për zyrtarët e nivelit të lartë dhe të mesëm të një vendi që ka qenë në luftë për gati tetë vjet”, ka thënë Klitschko për Daily Telegraph.

Ish-boksieri ka aluduar për konfliktet e kahershme në Ukrainë, pas të cilave rajoni i Krimesë u aneksua njëanshëm nga Rusia në vitin 2014.

https://twitter.com/Telegraph/status/1477405081955975170?ref_src=twsrc%5Etfw%7Ctwcamp%5Etweetembed%7Ctwterm%5E1477405081955975170%7Ctwgr%5E%7Ctwcon%5Es1_c10&ref_url=https%3A%2F%2Ftelegrafi.com%2Flegjenda-e-boksit-vitali-klitschko-nis-stervitjet-rezervistet-ushtarake-te-ukraines%2F

Ndërkaq, në javët e fundit, Kievi e ka akuzuar Moskën për grumbullimin e dhjetëra mijëra ushtarëve në afërsi të kufijve me Ukrainën në përgatitje për një ofensivë të mundshme.

Në anën tjetër, Rusia ka mohuar se është në përgatitje të çfarëdo sulmi, porse e ka akuzuar Ukrainën dhe Shtetet e Bashkuara të Amerikës për sjellje destabilizuese dhe ka kërkuar garanci kundër zgjerimit të NATO-s në lindje.

Së bashku me legjendën e futbollit, Andriy Shevchenko dhe vëllanë e tij, Wladimir, Klitschko është një prej sportistëve më të popullarizuar në Ukrainë. /Telegrafi