Lajçak flet për takimet me Kurtin e Vuçiqin

Përfaqësuesi Special i Bashkimit Evropian për dialogun Kosovë-Serbi, Miroslav Lajçak, ka zhvilluar takime të ndara me kryeministrin e Kosovës Albin Kurti dhe presidentin e Serbisë Aleksandar Vuçiq.

Ai në një postim në Twitter ka bërë të ditur që në këto takime kanë diskutuar për hapat e mëtutjeshëm për dialogun Kosovë-Serbi.

“Në margjinat e Forumit Strategjik të Bledit unë zhvillova dy takime të rëndësishme dhe thelbësore me presidentin e Serbisë Aleksandar Vuçiq dhe me kryeministrin e Kosovës Albin Kurti për të diskutuar për hapat e ardhshëm në javët e ardhshme në dialogun për normalizimin e marrëdhënieve të tyre”, ka shkruar ai.
Takimët e sotme do të shërbëjne si përgatitje për takimin e përbashkët që do të mbahet pas disa ditëve në Bruksel mes delegacioneve të Kosovës dhe Serbisë të ndërmjetësuar nga Brukseli.

Takimit në nivel të lartë do t’i paraprijë një takim në nivel kryenegociatoresh të Kosovës dhe Serbisë.

Kosova në këtë nivel prezantohet nga zv-kryeministri i parë, Besnik Bislimi.

Deri më tani janë zhvilluar dy takime në Bruksel mes Kurtit dhe Vuçiqit.